អំពីយើងខ្ញុំ

ឆ្នាំ២០២៣ សេដ្ឋកិច្ចពិភពលោកបានបន្តងើបឡើងក្នុងល្បឿនយឺត ដោយសារការអូសបន្លាយនៃសង្គ្រាមរុស្ស៊ី-អ៊ុយក្រែន ការរឹតបន្តឹងនយោបាយរូបិយវត្ថុនៅប្រទេសអភិវឌ្ឍន៍ចម្បងៗ ការកើនឡើងភាពតានតឹងភូមិសាស្ត្រនយោបាយនៅមជ្ឈិមបូព៌ាជាដើម។ ក្នុងស្ថានភាពនេះ កំណើនសេដ្ឋកិច្ចពិភពលោក ត្រូវបានរំពឹងថាអាច សម្រេចបានទាបជាងឆ្នាំ២០២២។

ការថមថយកំណើនសេដ្ឋកិច្ចពិភពលោក និងតំបន់ បានដាក់សម្ពាធ ដល់សេដ្ឋកិច្ចកម្ពុជា ជាពិសេស ការនាំចេញផលិតផលកាត់ដេរ និងការធ្លាក់ចុះនៃវិស័យសំណង់ និងអចលនទ្រព្យ។ ប៉ុន្តែការងើបឡើងនៃវិស័យទេសចរណ៍ កំណើនការនាំចេញផលិតផល មិនមែនកាត់ដេរ និងកំណើនតម្រូវការក្នុងស្រុក បានរួមចំណែក គាំទ្រសេដ្ឋកិច្ចកម្ពុជាសម្រេចបានប្រហាក់ប្រហែលនឹងឆ្នាំ២០២២ ពោលគឺក្នុងរង្វង់៥% (ប្រភព៖ ក្របខ័ណ្ឌហិរញ្ញវត្ថុសាធារណៈ រយៈពេលមធ្យមឆ្នាំ២០២៥-២០២៧)។ ការសម្រេចបានកំណើននេះ កើតឡើងដោយសារមានការគាំទ្រ មិនអាចខ្វះបានពីស្ថិរភាពនយោបាយ ដែលជាមូលដ្ឋានគ្រឹះនៃជំនឿទុកចិត្ត និងការអភិវឌ្ឍ ប្រកបដោយនិរន្តរភាព។

ទន្ទឹមនេះ ប្រព័ន្ធធនាគារនៅកម្ពុជា បន្តរក្សាបានភាពធន់ និងមានវឌ្ឍនភាពជាលំដាប់ ដែលធានាដល់ការរក្សាចីរភាពហិរញ្ញប្បទាន និងសេវាហិរញ្ញវត្ថុចាំបាច់នានា ក្នុងការរួមចំណែកគាំទ្រសកម្មភាពសេដ្ឋកិច្ច និងសង្គម។ ទោះជាយ៉ាងណាក៏ដោយការផ្តល់ឥណទាន នៅឆ្នាំ២០២៣ នេះ មានកំណើនតិចតួចបំផុតពោលគឺ ត្រឹមតែ ៤,៨% ប៉ុណ្ណោះ ដែលជាអត្រាទាបបំផុតក្នុងរយៈពេលជាង ២ទសវត្សរ៍ចុងក្រោយនេះ ស្របពេលដែលធនាគារជាតិ នៃ កម្ពុជា បានសម្រេចបញ្ចប់ការរៀបចំឥណទានឡើងវិញ សម្រាប់វិបត្តិកូ វីដ-១៩។ ជាមួយនេះ អនុបាតឥណទានមិនដំណើរការបន្តកើនឡើង ដែលតម្រូវឱ្យគ្រឹះស្ថានធនាគារ និងហិរញ្ញវត្ថុ ត្រូវដាក់ចេញវិធានការ ចាំបាច់នានា ដើម្បីបង្កើនការតាមដាន ការវាយតម្លៃ និងរឹតបណ្ដឹង ការផ្តល់ឥណទានថ្មីបន្ថែម និងការធ្វើស្ត្រេសតេស្តជាប់ជាប្រចាំ លើហានិភ័យដែលអាចកើតឡើងជាយថាហេតុ។

ធនាគារសហគ្រាសធុនតូច និងមធ្យម កម្ពុជា មានចរិតជាធនាគារ គោលនយោបាយ ដែលត្រូវបានបង្កើតឡើងដោយឈរលើ ចក្ខុវិស័យ បេសកកម្ម និងគុណតម្លៃរបស់ខ្លួន ដើម្បីអនុវត្តគោលនយោបាយហិរញ្ញប្បទានរបស់រាជរដ្ឋាភិបាល គាំទ្រដល់សហគ្រាសធុនតូច និងមធ្យម សំដៅជំរុញពិពិធកម្មសេដ្ឋកិច្ច និង ការនាំចេញស្របតាមគោលនយោបាយរបស់រាជរដ្ឋាភិបាល។ នៅក្នុងឆ្នាំ២០២៣ ធនាគារសហគ្រាសធុនតូច និងមធ្យម កម្ពុជា សម្រេចបាននូវលទ្ធផលការងារចម្បងៗមួយចំនួន ដូចជា៖

• ទ្រព្យសកម្មសរុបមានចំនួន ៣២២ លានដុល្លារ អាម៉េរិក កើនឡើងប្រមាណ ១៥% ពីឆ្នាំ២០២២ ដែលមាន ២៨១ លានដុល្លារអាម៉េរិក។

• សមតុល្យឥណទានដុលសរុបមានចំនួន ២២០ លានដុល្លារអាម៉េរិក កើនឡើងប្រមាណ ៣% ប៉ុណ្ណោះ ពីឆ្នាំ២០២២ ដោយសារការសង ត្រឡប់ជាបណ្តើរៗ ពីអតិថិជនក្រោមគម្រោងសហហិរញ្ញប្បទាន ទាំង ២ ដែលបានអនុវត្តចប់ទាំងស្រុង តាំងពីឆ្នាំ២០២១ និង២០២២។ ទន្ទឹមនេះ សមតុល្យឥណទាន ដោយផ្ទាល់ ដែលផ្តល់ត្រង់ពីធនាគារទៅឱ្យសហគ្រាស គោលដៅបានកើនឡើងប្រមាណ ៦១% ធៀបនឹងឆ្នាំ២០២២ ស្មើនឹង ៣២,៧ លានដុល្លារអាម៉េរិក។

• បានបង្កើតចំណែកទីផ្សារថ្មីបន្ថែម គឺ SME Plus និងបានបង្កើនទំហំឥណទាន (សម្រាប់អតិថិជនម្នាក់) រហូតដល់ ១ លានដុល្លារអាម៉េរិក ដើម្បីពង្រីកការគាំទ្រដល់សហគ្រាស ដែលមានទំហំធំជាងមុខ ស្របតាមការរីកចម្រើននៃសេដ្ឋកិច្ចកម្ពុជា។ បន្ថែមលើនេះ ធនាគារ ក៏បានបង្កើតឱ្យមានគម្រោងហិរញ្ញប្បទានខ្នាតតូច ដែលមិនយកទ្រព្យធានាក្នុងកម្រិតឥណទានត្រឹម ៥០ ពាន់ដុល្លារអាម៉េរិក (សម្រាប់អតិថិជនម្នាក់) ដើម្បីគាំទ្រដល់អាជីរកម្មធុនមីក្រូ ដែលមានចំនួនច្រើនលើសលប់ និងមានការលំបាកក្នុងការទទួលបានហិរញ្ញប្បទានដោយសារ មិនមានទ្រព្យធានាដាក់ឱ្យធនាគារ។

• បានដាក់ឱ្យដំណើរការ “កម្មវិធីកម្ចីដោយផ្ទាល់ ដល់ប្រតិបត្តិ ករទេសចរណ៍នៅខេត្តសៀមរាប” ជាមួយនឹងកញ្ចប់ថវិកាចំនួន ៥០ លានដុល្លារអាម៉េរិក ដែលផ្តល់ជូនដោយផ្ទាល់ពីធនាគារ សហគ្រាសធុនតូច និងមធ្យម កម្ពុជា ដើម្បីគាំទ្រវិស័យទេសចរណ៍ទៅខេត្តសៀមរាប ក្រោមវិធានការកែទម្រង់មុត ស្រួចជាកញ្ចប់របស់រាជរដ្ឋាភិបាល។

• បានបង្កើតសាខាថ្មីបន្ថែមចំនួន ៤ (សាខាប្រភេទ flagship ចំនួន ១ និងសាខាប្រភេទ satellite ចំនួន ៣) នៅខេត្ត ត្បូងឃ្មុំ (បានដាក់ឱ្យដំណើរការនៅឆ្នាំ២០២៣), ខេត្ត បន្ទាយមានជ័យ, ខេត្តកំពង់ស្ពឺ និងខេត្តកំពត (គ្រោងដាក់ឱ្យ ដំណើរការនៅដើមឆ្នាំ២០២៤) ដើម្បីពង្រីកវិសាលភាព ក្នុងការគាំទ្រដល់បណ្តាខេត្តដែលមានសក្តានុពល។

• បន្តអភិវឌ្ឍដៃគូអាជីរកម្មជាមួយនឹងសមាគមសហគ្រាសធុន តូច និងមធ្យម គោលដៅចំនួន ៦ បន្ថែមទៀត ដើម្បីពង្រីកប្រព័ន្ធអេកូឡូស៊ីឱ្យធំទូលាយ សំដៅជម្រុញការផ្តល់ឥណទាន ឱ្យចំគោលដៅ និងឆាប់រហ័ស។ ជាមួយគ្នានេះ ធនាគារ ក៏បានចុះកិច្ចសហការជាមួយគ្រឹះស្ថានធនាគារ និងក្រុមហ៊ុនបច្ចេកវិទ្យា ហិរញ្ញវត្ថុធំៗមួយចំនួន ដើម្បីផ្តល់ជម្រើសកាន់តែសម្បូរបែប ជូនដល់អតិថិជនក្នុងការសងត្រឡប់ឥណទានមកធនាគារវិញ ប្រកបដោយភាពងាយស្រួល ឆាប់រហ័ស និងចំណាយតិច។

• បានបង្កើនចំនួនបុគ្គលិករហូតដល់ ២២២នាក់ កើនឡើង ប្រមាណ ៦៣% ធៀបនឹងឆ្នាំ២០២២ ស្មើនឹង ៨៦នាក់។

• ម្យ៉ាងទៀត ធនាគារក៏បានរួមចំណែកជាមួយភាគីពាក់ព័ន្ធទាំងស្ថាប័នសាធារណៈ និងឯកជន ក្នុងសកម្មភាពលើកកម្ពស់ ចំណេះដឹងហិរញ្ញវត្ថុ ជូនដល់សហគ្រាសធុនតូច និងមធ្យម ដើម្បីជំរុញលទ្ធភាពក្នុងការទទួលបានហិរញ្ញប្បទានពីស្ថាប័ន ហិរញ្ញវត្ថុផ្លូវការ និងសារៈសំខាន់នៃការប្រើប្រាស់ឥណទាន ដែលទទួលបានឱ្យចំគោលដៅ សម្រាប់ការអភិវឌ្ឍអាជីរកម្មរបស់ខ្លួន ប្រកបដោយនិរន្តភាព និងភាពធន។

ជារួម លទ្ធផលដែលទទួលបានខាងលើ បានបង្ហាញពីការខិតខំប្រឹងប្រែង និងប្តេជ្ញាចិត្តយ៉ាងមុតមាំរបស់ធនាគារសហគ្រាសធុន តូច និងមធ្យម កម្ពុជា ក្នុងការផ្តល់គុណតម្លៃដល់ភាគីពាក់ព័ន្ធរបស់ខ្លួន ហើយយើងនៅតែបន្តអនុវត្តការងារដ៏មានសារៈសំខាន់នេះ ប្រកបដោយស្មារតីទទួលខុសត្រូវខ្ពស់។

ជាកិច្ចបញ្ចប់ ខ្ញុំសូមសម្តែងនូវការគោរពដ៏ខ្ពង់ខ្ពស់ និងថ្លែងអំណរអរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា, ក្រសួង សេដ្ឋកិច្ច និងហិរញ្ញវត្ថុ, ធនាគារជាតិ នៃ កម្ពុជា និងស្ថាប័នពាក់ព័ន្ធទាំងអស់ ដែលតែងតែផ្តល់ការគាំទ្រ នាពេលកន្លងមក។ ខ្ញុំសូមថ្លែងអំណរគុណយ៉ាងស្មោះ ចំពោះក្រុមប្រឹក្សាភិបាល និងគណៈ គ្រប់គ្រង ព្រមទាំងបុគ្គលិកគ្រប់ជាន់ថ្នាក់ របស់ធនាគារសហគ្រាស ធុនតូច និងមធ្យម កម្ពុជា ដែលបានផ្តល់នូវអនុសាសន៍ណែនាំ និងខិតខំបំពេញការងារអស់ពីកម្លាំងកាយចិត្តប្រកបដោយស្មារតី ទទួលខុសត្រូវខ្ពស់ សំដៅរួមគ្នាកសាង និងអភិវឌ្ឍធនាគារឱ្យមានការអភិវឌ្ឍជឿនលឿន និងប្រកបដោយចីរភាព។ ជាមួយគ្នា នេះ ខ្ញុំសូមអរគុណដល់អតិថិជន និងដៃគូសហការនានា ដែលបានចូលរួមសហការ, គាំទ្រ និងផ្តល់ទំនុកចិត្តលើធនាគារសហគ្រាស ធុនតូច និងមធ្យម កម្ពុជា ក្នុងការលើកកម្ពស់ និងអភិវឌ្ឍវិស័យ អេស អឹម អឺ នៅកម្ពុជា ឱ្យកាន់តែមានភាពរីកចម្រើន។