អំពីយើងខ្ញុំ

ជូនចំពោះអតិថិជន និងសាធារណជនជាទីគោរពរាប់អាន

ទោះបីជាពិភពលោកបានទទួលរងនូវបញ្ហាប្រឈមពីការរីករាលដាលនៃជំងឺរាតត្បាត និង​វិបត្តិមួយចំនួន ដែលនាំឲ្យ​ប៉ះពាល់ជាអវិជ្ជមានដល់សេដ្ឋកិច្ចសកល និងប្រទេសកម្ពុជា ក៏ធនាគារសហគ្រាសធុនតូច និងមធ្យម កម្ពុជា (“ធនាគារ”) នៅតែបន្តបេសកកម្មរបស់ខ្លួនយ៉ាងសកម្មដើម្បីគាំទ្រដល់កំណើន និងការអភិវឌ្ឍរបស់សហគ្រាសធុនតូច និងមធ្យមនៅកម្ពុជា។ ធនាគារ បានបន្តប្តេជ្ញាចិត្តក្នុងការផ្តល់ហិរញ្ញប្បទាន ប្រកប​ដោយ​​ ប្រសិទ្ធភាពជូនដល់ម្ចាស់សហគ្រាសដែលគាំទ្រវិស័យអាទិភាព ដើម្បីចូលរួមចំណែក​ក្នុងការស្ដារ និងអភិវឌ្ឍសេដ្ឋកិច្ចកម្ពុជា ស្របតាមក្របខណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ២០២១-២០២៣។

នៅក្នុងឆ្នាំ២០២២ ធនាគារបានបន្តយកចិត្តទុកដាក់លើការពង្រីកបណ្តាញចែកចាយឲ្យកាន់តែទូលំទូលាយដូចជា៖ (១). ធនាគារបានធ្វើការផ្លាស់ប្តូរការិយាល័យកណ្តាលរបស់ខ្លួនមកកាន់អគារ “មជ្ឈមណ្ឌលអភិវឌ្ឍន៍ធុរកិច្ច” ក្រសួងសេដ្ឋកិច្ច និង ហិរញ្ញវត្ថុ ដែលជាទីតាំងធំទូលាយជាងមុន និងមានស្ថាប័នចម្រុះជាច្រើននៅជួយគាំទ្រដល់សហគ្រិនទាំងផ្នែកបច្ចេកទេស, ហិរញ្ញវត្ថុ និងការអភិវឌ្ឍធនធានមនុស្ស, (២). ធនាគារបានដាក់ឲ្យដំណើរការជាផ្លូវការនូវសាខាថ្មីចំនួន ២ បន្ថែមទៀត ពោលគឺ សាខាផ្សារថ្មី និងសាខាខេត្តបាត់ដំបង ដើម្បីផ្តល់ភាពងាយស្រួលទៅដល់ម្ចាស់សហគ្រាសធុនតូច និងមធ្យម ដែលត្រូវការការគាំទ្រផ្នែកហិរញ្ញវត្ថុ, (៣). ធនាគារក៏បានអភិវឌ្ឍបន្ថែមនូវដៃគូអាជីវកម្មមួយចំនួនទៀត ដែលរួមមាន៖ សមាគមថ្នាលធុរកិច្ច, ធនាគារពាណិជ្ជ, ក្រុមហ៊ុនសេវាទូទាត់, ក្រុមហ៊ុនបច្ចេកវិទ្យាហិរញ្ញវត្ថុ, ស្ថាប័នសាធារណៈក្នុងស្រុក និងអន្តរជាតិ  ដើម្បីពង្រីកវិសាលភាពនៃការផ្តល់សេវាកម្មឲ្យកាន់តែទូលំទូលាយ និងខិតកាន់តែជិតអតិថិជនគោលដៅ។ លើសពីនេះ ធនាគារបានដាក់ចេញនូវផែនការច្បាស់លាស់សម្រាប់ការធ្វើទំនើបកម្មប្រព័ន្ធបច្ចេកវិទ្យាព័ត៌មាន និងការអភិវឌ្ឍហេដ្ឋារចនាសម្ព័ន្ធថ្នាលឌីជីថល ឲ្យកាន់តែទំនើបដើម្បីធ្វើឲ្យប្រសើឡើងនូវបទពិសោធន៍នៃការប្រើប្រាស់សេវាកម្មពីសំណាក់អតិថិជនឲ្យកាន់តែមានប្រសិទ្ធភាព និងចំណេញពេលវេលា ស្របតាមក្របខណ្ឌ គោលនយោបាយសេដ្ឋកិច្ចឌីជីថល និង សង្គមឌីជីថលកម្ពុជា ២០២១-២០៣៥។ 

ដើម្បីពន្លឿនការផ្តល់ហិរញ្ញប្បទានឲ្យមានប្រសិទ្ធភាពខ្ពស់ ធនាគារបានធ្វើការកែសម្រួលនិយមន័យសហគ្រាសធុនតូច និងមធ្យម ឲ្យសមស្របនឹងការវិវឌ្ឍននៃសង្គម-សេដ្ឋកិច្ចនាពេលបច្ចុប្បន្ន និងបានបង្កើនទំហំឥណទានអតិបរមាពី ៥០០,០០០​ ដុល្លារអាមេរិក ទៅ ១,០០០,០០០ ដុល្លារអាមេរិក សម្រាប់អតិថិជនម្នាក់។ ជាងនេះទៀត ធនាគារក៏បានដាក់ចេញនូវគម្រោងហិរញ្ញប្បទានគ្មានទ្រព្យធានា និងហិរញ្ញប្បទានវិបារូបន៍ ដែលបានផ្តល់នូវជម្រើសបន្ថែមដល់សហគ្រាសគោលដៅក្នុងការប្រើប្រាស់ឲ្យស្របតាមគោលបំណង និងប្រភេទអាជីវកម្មជាក់ស្តែង។ 

គិតត្រឹមការិយបរិច្ឆេទឆ្នាំ២០២២ នេះ​  ធនាគារសម្រេចបានទ្រព្យសកម្មសរុបចំនួន ២៨១ លានដុល្លារអាមេរិក ដែលកើនលើសពីឆ្នាំ២០២១ ចំនួន ១៣១ លានដុល្លារអាមេរិក ក្នុងនោះសមតុល្យឥណទានសរុបមានចំនួន ២១៤ លានដុល្លារអាមេរិក។ ទន្ទឹមនេះ នៅខែកញ្ញា ឆ្នាំ២០២២ ធនាគារបានបញ្ចប់ដោយជោគជ័យ នូវគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម ជំហានទី២ ដែលបានផ្តល់ការគាំទ្រដល់សហគ្រាស សរុបចំនួន ១ ៩៩២ ស្មើនឹងទំហំទឹកប្រាក់សរុប ២៤០ លានដុល្លារអាមេរិក (១២០ លានដុល្លារអាមេរិក បានមកពីរាជរដ្ឋាភិបាលកម្ពុជា ​តាមរយៈក្រសួងសេដ្ឋកិច្ច​ និងហិរញ្ញវត្ថុ​ និង ធនាគារ និង ១២០ លានដុល្លារអាមេរិកផ្សេងទៀត បានមកពីគ្រឹះស្ថានហិរញ្ញវត្ថុចូលរួម)។ មិនតែប៉ុណ្ណោះ ធនាគារ ក៏បានរៀបចំ​ និងដាក់ឲ្យដំណើរការគម្រោងសហហិរញ្ញប្បទានស្តារ និងជំរុញកំណើនក្នុងវិស័យ​ទេសចរណ៍ នូវចំនួនទឹកប្រាក់សរុប ១៥០ លានដុល្លារអាមេរិក (៧៥ លានដុល្លារអាមេរិក បានមកពីរាជរដ្ឋាភិបាល​កម្ពុជា​ តាមរយៈក្រសួងសេដ្ឋកិច្ច​ និងហិរញ្ញវត្ថុ​ និង ធនាគារ និង ៧៥ លានដុល្លារអាមេរិក ផ្សេងទៀត បានមកពីគ្រឹះស្ថានហិរញ្ញវត្ថុចូលរួម) ដែលគិតត្រឹមខែធ្នូ ឆ្នាំ២០២២ មានសហគ្រាសសរុបចំនួន ២៩១ និងកំពុងប្រើប្រាស់ហិរញ្ញប្បទានសរុបចំនួន ៤១,៥២ លានដុល្លារអាមេរិក ដែលស្មើនឹង ២៧.៦៨%​ នៃគម្រោងថវិកាសរុប។

ផែនការយុទ្ធសាស្រ្តសំខាន់សម្រាប់ឆ្នាំបន្ទាប់ រួមមាន៖ (១). ធ្វើការកែលម្អ និងអភិវឌ្ឍផលិតផល និងសេវាកម្មឲ្យកាន់តែល្អប្រសើរ ដើម្បីឆ្លើយតប នឹងតម្រូវការរបស់អតិថិជនគោលដៅ, (២). បន្តអភិវឌ្ឍបណ្តាញចែកចាយដូចជាសាខា៖ ដៃគូអាជីវកម្ម, ការអភិវឌ្ឍហេដ្ឋារចនាសម្ព័ន្ធបច្ចេកវិទ្យា ថ្នាលឌីជីថល ដែលជាចំណុចតភ្ជាប់យ៉ាងទូលំទូលាយ និងខិតឲ្យនៅជិតអតិថិជនគោលដៅ, (៣). អភិវឌ្ឍធនធានមនុស្សឲ្យមានចំណេះ និងជំនាញគ្រប់គ្រាន់ដែលធានាបាននូវប្រសិទ្ធភាព និងតម្លាភាពកាងារ​, និង (៤). រៀបចំឲ្យមានប្រព័ន្ធគ្រប់គ្រងហានិភ័យ និងវប្បធម៍គ្រប់គ្រងហានិភ័យ ឲ្យកាន់តែល្អប្រសើរ។​ 

សមិទ្ធផលទាំងអស់នេះ ទទួលបានតាមរយៈការគាំទ្រផ្នែកហិរញ្ញវត្ថុ និងបច្ចេកទេស ពីក្រសួងសេដ្ឋកិច្ច និងហិរញ្ញវត្ថុ, ព្រមទាំងកិច្ចសហប្រតិបត្តិការ របស់អាជ្ញាធរមានសមត្ថកិច្ច ជាពិសេស ធនាគារជាតិ នៃ កម្ពុជា ដែលជាអាណាព្យាបាល លើសពីនេះ ខ្ញុំសូមថ្លែងអំណរ​​គុណយ៉ាងជ្រាលជ្រៅបំផុតចំពោះអតិថិជន ក្រុមប្រឹក្សាភិបាល ថ្នាក់គ្រប់គ្រង និងបុគ្គលិក ព្រមទាំងដៃគូអាជីវកម្មដែលតែងតែផ្តល់ការគាំទ្រចំពោះធនាគារដើម្បីបានសម្រេច​ នូវលទ្ធផលស្របតាមផែនការ ជាពិសេសក្នុងឆ្នាំ២០២២។