ខេត្តព្រះសីហនុ, នារសៀលថ្ងៃសៅរ៍ ទី៨ ខែកុម្ភៈ ឆ្នាំ២០២៥ ធនាគារសហគ្រាសធុនតូច និងមធ្យម កម្ពុជា ម.ក (ធ.ស.ក) បានរៀបចំកិច្ចប្រជុំប្រចាំឆ្នាំ២០២៥ ក្រោមប្រធានបទ «អេសអ៊ឹមអ៊ី តែមួយ (ONE SME)» នៅសណ្ឋាគារណូវូតែល ក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាល ធ.ស.ក ព្រមទាំងបានការចូលរួមពីសំណាក់ ឯកឧត្តម/លោកជំទាវ សមាជិកក្រុមប្រឹក្សាភិបាល, គណៈគ្រប់គ្រង និងបុគ្គលិកធនាគារ សរុបប្រមាណ ២១០នាក់។ ពិសេសជាងកិច្ចប្រជុំសព្វដង, កិច្ចប្រជុំប្រចាំឆ្នាំនេះត្រូវបានរៀបចំឡើងចំខួបឆ្នាំទី៥ នៃការចាប់ផ្តើមប្រតិបត្តិការរបស់ ធ.ស.ក ២០២០-២០២៥។
លោក ជា សុភ័ក្ត អគ្គនាយកស្តីទី ធ.ស.ក បានធ្វើរបាយការណ៍សង្ខេបអំពីវឌ្ឍនភាពការងារប្រចាំឆ្នាំ២០២៤ និងផែនការយុទ្ធសាស្ត្រសម្រាប់ឆ្នាំ២០២៥ ព្រមទាំងបានបូកសរុបនូវលទ្ធផលរួមដែល ធ.ស.ក សម្រចបានក្នុងរយៈពេល ៥ ឆ្នាំ កន្លងមកនេះ។ ជាលទ្ធផល គិតត្រឹមពេលនេះ ធ.ស.ក បានផ្តល់ហិរញ្ញប្បទានក្នុងលក្ខខណ្ឌអនុគ្រោះ ពោលគឺអត្រាការប្រាក់ទាប ចន្លោះពី ៤% ទៅ ៦,៥% សម្រាប់វិស័យអាទិភាព ដល់សហគ្រាសធុនតូច និងមធ្យមសរុបជាង ៣ ៤០០ សហគ្រាស ដែលស្មើនឹងសមតុល្យឥណទានសរុបប្រមាណ ៥០០ លានដុល្លារអាម៉េរិក។ ក្នុងនោះ ឥណទានដែលបានបញ្ចេញទៅ វិស័យកែច្នៃ ផលិត និងកម្មន្តសាល ដែលជាវិស័យអាទិភាពរបស់ ធ.ស.ក មានប្រមាណ ៧០លានដុល្លារអាម៉េរិក ដែលស្មើទៅនឹង ៥០% នៃសមតុល្យឥណទានដោយផ្ទាល់សរុប។ គម្រោងហិរញ្ញប្បទានស្រ្តី ប្រមាណ ៤៤លានដុល្លារអាម៉េរិក ដែលស្មើនឹង ៣៦% នៃសមតុល្យឥណទានដោយផ្ទាល់សរុប។
ជាការឆ្លើយតប ឯកឧត្តមបណ្ឌិត ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាល ធ.ស.ក បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងបុគ្គលិកទាំងអស់ ដែលបានខិតខំបំពេញការងារក្នុងរយៈពេលពេញមួយឆ្នាំ ២០២៤ និងបានសម្តែងនូវការសារទរចំពោះសមិទ្ធផលរួមដែលសម្រេចបានក្នុងរយៈពេល ៥ ឆ្នាំ កន្លងមកនេះ។ ជាមួយគ្នានេះ ឯកឧត្តមបណ្ឌិត បានសង្កត់ធ្ងន់លើសមិទ្ធផលរំពឹងទុកដោយក្រុមប្រឹក្សាភិបាលសម្រាប់ឆ្នាំ ២០២៥ នេះ ព្រមទាំងបានផ្តល់នូវអនុសាសន៍ល្អៗ ជាច្រើនដល់គណៈគ្រប់គ្រង និងបុគ្គលិក សំដៅជំរុញប្រសិទ្ធភាពការងារ។
ជារៀងរាល់ឆ្នាំ ធនាគារតែងរៀបចំកិច្ចប្រជុំប្រចាំឆ្នាំ កម្មវិធីទទួលបានអាហារសាមគ្គី និងសកម្មភាពជាក្រុម ក្នុងគោលបំណងផ្សារភ្ជាប់ទំនាក់ទំនងរវាងថ្នាក់ដឹកនាំ និងបុគ្គលិក ក៏ដូចជាការទទួលស្គាល់ និងផ្តល់ជូននូវលើកទឹកចិត្ត ដល់ការខិតខំប្រឹងប្រែងរបស់បុគ្គលិកឆ្នើម និងពង្រឹងនូវសាមគ្គីភាព និងស្មារតីការងារក្រុម។
